24 მარტს, ჭავჭავაძის ცენტრის ოფისში მოქალაქეობისა და მართლმსაჯულების თემაზე მორიგი კინოჩვენება და დისკუსია გაიმართა. დისკუსიას უძღვებოდნენ ჭავჭავაძის ცენტრის დამფუძნებელი ზაზა ბიბილაშვილი და მედიაფსიქოლოგი, პროფესორი მარიამ გერსამია. ნაჩვენები იქნა რიჩარდ ლაგრავენესის 2007 წლის ფილმი „თავისუფლების მწერლები“. ფილმის ჩვენების შემდეგ გაიმართა დისკუსია ისეთ თემებზე, როგორიცაა თავისუფლება და ინდივიდუალური პასუხისმგებლობა, სტერეოტიპების გავლენა ადამიანის ქცევასა და აზროვნებაზე, განათლებისა და მასწავლებლის როლი საზოგადოების ტრანსფორმაციაში. საუბარი ასევე შეეხო საქართველოს საბჭოთა წარსულს და განათლების სისტემის წინაშე მდგარ გამოწვევებს.

 

უკვე მესამე წელია, რაც პროექტს „ახალგაზრდები მართლმსაჯულებისთვის ზაზა ბიბილაშვილთან ერთად“ ილია ჭავჭავაძის ცენტრი ჰოლანდიური D66-ისა და IDI-ის მხარდაჭერით ახორციელებს. ამ პერიოდში, საქართველოს რეგიონებსა და საგანმანათლებლო დაწესებულებებში მოქალაქეობისა და მართლმსაჯულების თემაზე ათეულობით კინოჩვენება და დისკუსია გაიმართა. პროექტის ფარგლებში ცენტრი თანამშრომლობს უმაღლეს საგანმანათლებლო დაწესებულებებთან, კერძო და საჯარო სკოლებთან, ასევე - ადგილობრივ არასამთავრობო ორგანიზაციებთან.